बेरा ना या अल्बाद पहलम भी मन्ने बताई स अक नि | याद आगि स ते बता दयूं घणे-तें घणी एक पुन्झडि लाग जा गी जा पहलम बताई हो गी ते | जब हाम छोट्टे थे अर एक बड्डे बालकां के मिक्स गेंग में रहया करदे | म्हारे गाम की सडक टूट रि थी , अर घणे बड्डे-बड्डे खड़े बण रे थे , अर उन् में पांणी भर्या रंदा सारी हाण , बेरा भी ऩा पाटदा , अक कुन्सा खड्डा किन्ना डूंघा स | कई बे ते ट्रक भी धंस के ने खड़े हो जाया करदे , अर उनकी कमाणी वगेरा भी टूट जांदी ,जिन्न ने हाम ठा लिया करदे , अर फेर रहड़ी आलयाँ पे लोहे के बदले चीजो खाण के काम आंदी | म्हारा टाइम पास थे सडक के खड्डे | हाम सडक के साहरे संतर में खड़े रह्डू में आपणा कमठाणा बणा लेंदे अर बाट देखें जांदे अक कब सी किः के सुवाद ल्यां | उन् तीन-चार मिह्न्याँ में ईतने सड़क ठीक ऩा हो ली , ईतने हामने निरे ते केले खाए | हिस्सार कानी केल्यां के भरे ट्रक जाया करदे , उन् में तें केल्यां के गुछे काढ लेंदे , अर तुडे में दाब देंदे ,दो-तीन दिन वे खाण जोगे हो जांदे | एक दिन एक स्कूटर पे कोए मोटा सा बाणिया जावे था , घणे मोटर साइकल आले या सकूटर आले ते उतर के जाया करदे | पर यु बाणिया मोटा घणा था ,इह पे उतर्या भी ऩा जावे था | मेरे ख्याल में उह पे आप भी ऩा चाल्या जांदा होगा ,सकूटर ने ते जब ले जा था घशीट के | किहे ने गेल तें रुक्का मार दिया , अक लाला जी संभल के ने जाइओ, खड्डे सें कदे पड़ जाओ | उह ने कई ट्रक भी लोजे लेंदे देख लिए | वो घबरा के ने म्हारी गाल आगे , सड़क के बीचाले खड्या होगा | अर लाग्या बुझण अक कितोड़ के जाऊं | म्हारे मांह तें कोए ते न्यू कह दे , अक उराँ के हो ल्यो , अर कोए न्यू कह दे , अक पराँ के हो ल्यो | सामी खड्डा स | जित वो खड्या था ,जा उथों सीधा चाले जांदा , ते साफ़ लिकड जांदा , पर कराड़ के जिस्से लेणे थे | दोनु ओड़ ने खड्डे थे ,जीतोड़ के भी जांदा घल्ना था जरूर | वो हिम्मत सी कर के अर माहरे कानी हो लिया , सकूटर ले के ने , अर गया सुधाँ स्कूटर गोड्डयाँ डूंघे खड्डे में छपाक तें | फेर हामने वो काढ्या मुस्साँ सी अर उह ने म्हारे ताहीं निरी दुआ दि अक बालकां ने उह की भोत सहायता करी | कराड़ बेचारा ,सुवाद म्हारा |
विशेष :- इब्ब कोए भाई न्यू शिक्सा ऩा दिओ अक हामने बानिये की गेल्याँ अमानवीय व्यवाहर का गलत काम कर्या |
